VIGAN CITY – Kaso a panaglabsing ti Republic Act 9165 iti sangwen ti maysa a lalaki nga street level individual ta naalaan ti 0.6 a gramo iti mapapati a shabu ken duapulo a gramo iti bulong marijuana iti naisayangkat a search warrant operation idiay Sitio Purok, Barangay Casilagan, Narvacan, Ilocos Sur.
Ti suspek ket ni alyas Ay-ay, agtawen iti uppat a pulo ket maysa, naasawaan, mannalon nga agnaed iti nasao a lugar.
Iti pannaki-uman ti Bombo Radyo Vigan ken ni PMaj. Alexander John Dangli manipod Narvacan Municipal Police Station, idi napan a tawen ket nairaman ti nagan ti suspek maipanggep iti ilegal drugs isu a namonitor agingga nga adda nangibutaktak kenkuana iti madi nga aramidna idi Hunyo iti agdama a tawen ket naamoan a user ken pusher.
Segun ken ni Dangli, manarimaan pay laeng ti imbestigasyon nu sadino ti pagal-alan iti suspek iti ilaklakona a shabu.
Maipalagip nga itay alas singko bigat (August 13, 2024) ket insayangkat dagiti otoridad ti search warrant operation iti nasao a lugar a nakaalaan manipod ti suspek ti nasurok kumurang 0.6 a gramo iti mapapati a shabu a naipan iti dua a piraso ti heat-sealed transparent plastic sachet ken nasurok kumurang duapulo a gramo ti mapapati a napagango a bulong ti marijuana a mapatta-patta nga aggatad ti P2,400 a naipan iti dua a transparent knot tied ice plastic, kasta payen ti non-drug evidence a maysa a nangisit nga sling bag.
Nupay kasta, dagiti naala manipod ti suspek ket naipanen iti Crime Laboratory tapno matest idinto a naidalan ti suspek iti drug testing ket maamoan inton bigat ti resultana.
VIDEO – PMAJ. ALEXANDER JOHN DANGLI
