VIGAN CITY – Balligi ti pannakaiwayat ti search warrant operation iti ili ti Sta. Cruz kontra ti maysa a karpentero, agtawen iti uppat a pulo, agnaed iti nasao nga ili ken maibilang a high value individual iti regional priority target.
Iti pannaki-uman ti Bombo Radyo Vigan ken ni PCapt. Paul Vinsent Tadeo manipod Sta. Cruz Municipal Police Station, ti search warrant a naisayangkat ket para iti panaglabsing iti Republict Act 9165 wenno Comprehensive Dangerous Drugs Act of 2002 ken iti Republic Act 10591 wenno iti Comprehensive Firearms and Ammunition Regulations Act.
Bayat ti pannakaiwayat ti operasyon, awan ti nasao a respondent ngem imbagi isuna ti live-in partnerna ken ti inana.
Segun kenkuana, dagiti naala nga ebidensya ket pakairamanan ti walo a piraso ti heat sealed transparent small size plastic sachet a naglaon iti mapapati a shabu nga agdagsen iti maysa a gramo ken aggatad iti innem a ribo walo gasut a pisos; sangapulo ket maysa a piraso ti small size plastic sachet a naglaon iti residue ti mapapati a shabu; ken maysa a piraso ti narolyo nga aluminum foil a naglaon iti mapapati a shabu.
Malaksid dayta, naala pay ti sling, maysa a piraso ti caliber 38 nga adda uppat a balana; siam a piraso ti bala ti caliber 38; glass tooter; walo a piraso ti lighter; dua a piraso ti getteng; maysa a surgical scissor; tallo nga straw; uppat a piraso ti crumpled aluminum foil; maysa a narolyo nga aluminum foil; ken maysa a piraso ti nakupin a bond paper.
Dagiti ebidensya a naala ket addan iti kustodia ti Sta. Cruz Police Staton para ti documentation sakbay a maiturn over iti korte.
Kabayatanna, kiddaw ni Tadeo kadagiti umili iti pannakitinnulongda para iti panangparmek iti nadumaduma nga illegal nga aktibidad babaen ti panangipakaammoda kadakuada.
VIDEO NI PCAPT. PAUL VINSENT TADEO
