VIGAN CITY – Naisayangkat iti Search and Rescue iti mapapati a pannakalmes ti maysa a seaman idiay Brgy. Callitong, Burgos.
Iti pannaki-uman ti Bombo Radyo Vigan ken ni PLt. Donaldson “Dondie” Pagalanan, OIC iti Burgos Municipalo Police Station, adda naawatda a report a mapukpukaw manipod idi alas kuatro ti malem idi kalman ni Roger Abril, seaman, agtawen ti limapulo ket maysa nga agnaed iti Brgy. Suso, Sta. Maria.
Segun kenni Pagalanan, adda ti nakanggeg nga agindeg nga adda ti timpwak iti waig ta alawenna ti kalding ngem kalpasan ti maysa nga oras ket awan metten ti biktima ngem no pay kasta saan pay a nalawag no aniya ti pudno a napasamak.
Nakiddaw kadagiti agindeg a sakupen ti Burgos River ken kaasidegna nga ili nga insigida nga ipakammoda kadagiti pannakabagi ti linteg nu adda makitada ti nasao nga indibidual.
Iti agdama agtultuloy ti operasyon nga isaysayangkat ti MDRRMC ken Burgos Municipal Police Station tapno masapolan ti biktima.
