VIGAN CITY – Agtultuloy ti search and rescue operation dagiti kameng ti Philippine Coast Guard iti ili ti San Esteban kadagiti mapukpukaw a mangngalap.
Nabigbig dagiti mangngalap a da Armando Mostoles, agtawen iti innem a pulo ket dua ken ti apona a ni Melvin Mostoles, agtawen iti sangapulo ket innem, agpada nga agnaed iti Barangay Apatot, San Esteban.
Iti pannaki-uman ti Bombo Radyo Vigan ken ni Police Major Aurelio Manantan iti San Esteban Police Station, nagturong kadakuada ni Reynaldo Oandasan, akinkukua iti bilog a naglugananda tapno ireport ti pannakapukaw dagiti mangngalap.
June 29 iti parbangon idi napanda nagkalap iti taaw ket iti malemna koma met laeng iti daytoy nga aldaw ti panagsublida ngem agingga iti agdama ket saanda pay a nagawid.
Dagus met nga impakaammoda iti Local Government Unit ken inalertoda ti PCG para iti panangsapulda kadagiti mapukpukaw a mangngalap.
Innayon ni Manantan a natalna ti sitwasyon iti kabaybayan iti parbangon ngem iti mumalem ket nadawelen gapu ti tudo.
Nupay kasta, pinalagipanna dagiti mangngalap nga agannad no mapanda agkalap nangruna no saan a napintas ti paniempo.
