VIGAN CITY – Agkam-kamat ti oras ti Department of Health ta bimmasit dagiti nagpabakuna gapu ti dengvaxia scare nga isu iti pabasolen ti ahensya a rason nu apay a rimsuwa ti measles outbreak kadagiti sumagmamano a lugar ditoy pagilian.
Manipud idi Enero agingga idi Hunyo iti agdama a tawen, immaboten iti 38, 508 iti nagkamuras ditoy pagilian a nangatngato ngem iti sangapulo ribo a bilang dagiti nagkamuras ditoy pagilian kadagiti isu met laeng a panawen idi napalabas a tawen.
Itatta a naiyuswat manen ti school-based immunization program, target ti DOH a mabakunaan dagiti agarup sangapulo a milyon nga estudyante, manipud Kinder agingga Grade 7 agingga inton Setyembre tapnu maliklikan nga umadu dagiti agkamuras.
Siyam a pulo ket walon a porsyento iti bilang dagiti innem a bulan agingga lima a tawen iti nabakunaanen kontra kamuras ngem kadagiti agtawen iti innem agingga sangapulo ket maysa ket 12 a porsyento pay laeng kadakuada iti nabakunaan ken dua pulo ket dua a porsyento met kadagiti agtawen iti sangapulo ket dua agpangato.
Pinasingkedan met ni Health Secretary Francisco Duque III a gapu ti amak dagiti nagannak iti measles outbreak, immadun dagiti mangayat a pabakunaan dagiti annak da.
