VIGAN CITY – Allukoyen ni TESDA-Ilocos Sur Provincial Director Joel Pilotin dagiti umili a makipaset kadagiti training program-da nga idiaya iti ahensya tapno mapasayaat iti biag dagiti agnaed iti probinsia.
Iti pannaki-uman ti Bombo Radyo Vigan ken ni Pilotin, kagiddan iti panagbalin a sekretarya iti Department of Agriculture ni President Ferdinand Marcos Jr. ket papigsaenda pay dagiti scholarship para kadagiti mannalon.
Segun ken ni Pilotin, addaanda iti scholarship a mabalin a pakipagpasetan dagiti mannalon babaen ti Rice Competitiveness Enhancement Program wenno RCEP program ket adda iti scholarship nga idiay-diaya dagiti school partners-da nga isu ti Agri-crops Production ken dadduma pay a training program para iti panangsimpa ti small engine, water pump ken generator.
Inyunay-unayna a napintas iti nasao a programa kangrunaan kadagiti agar-aramat kadagiti nasao a makina a mannalon tapno nu bilang adda madadael a pasetna ket ammoda a tarimaanen ta nangina iti pagpasimpa kadagiti makina.
Innayonna a rumbeng a makipasetda kadagiti program ta libre a maipaay kadakuada ket adda pay inaldaw nga allowance a maited kadakuada ken started kits.
Pakaragsakan ti presidente mannalon a ni Brett Tamango Rojas iti Brgy. Pudoc, San Vicente iti libre a programa para kadagiti mannalon tapno adu pay iti masursuroda inaig iti panagtalon.
Kiddawna iti TESDA a nasaysayaat nu maipakita nga actual dagiti sursurwenda tapno makasursuroda a nalaing.
Kabayatanna, allukoyenna dagiti padana a mannalon a makipaset kadagiti programa iti nasao nga ahensya para iti pagsayaatanda iti pagsapulanda.
