VIGAN CITY – Mairugin inton Lunes Abril 15 ti alas syete agingga alas onse iti bigat nga oras ti klase kadagiti pampubliko a pagadalan iti ili ti Santa kas maibasar iti inruar ti local government unit nga Executive Order No 85 series of 2024.
Iti pannaki-uman ti Bombo Radyo Vigan ken ni Vince Clyde Cardenas iti Municipal Disaster Risk Reduction and Management Office-Santa, ti baro nga schedule ti klase ket kas napagnunumuan ti local school board ken ti MDRRMC gapu iti mairekrekord a nangato a heat index.
Malaksid dayta, kalikagum pay met ti ili a maliklikan dagiti mangisursuro ken agad-adal ti makaptan kadagiti sakit a mabalin nga itunda ti nabara a paniempo.
No met bilang ngumato pay ti heat index iti agingga 42 degrees ket mangipaulogto manen ti mayor iti sabali a pammilin.
Kabayatanna, nangiyetnag pay met ti Department of Education ti pammilin nga inton Abril 15 ken 16 ket maipatungpal ti asynchronous classes wenno distance learning.
