VIGAN CITY – Inruaren ti schedule ken pagannurutan a suruten iti ili ti Bantay iti panangipatungpal ti Undas 2021.
Ti addang ket kalpasan iti temporaryo a pannakasarra kadagiti amin a kamposanto iti pagilian kas maibasar ti pangngeddeng ti National Inter-Agency Task Force.
Gapu iti dayta ket amin a pampubliko a kamposanto iti ili ti Bantay ket maipasarra manipod October 29 agingga November 2 iti agdama a tawen.
Manipod inton October 25, malimitaran ti agingga tallopulo a porsiento ti kapasidad kadagiti agturong iti amin a kamposanto ket maipalubos laeng manipod alas otso ti bigat agingga alas singko ti malem.
Nakaituding nga inton October 25 agingga October 28 ken November 3 agingga November 6 iti panangdalus ken bisita kadagiti pantyong ket agingga laeng dua nga oras ti pagpatingngaanna.
Inton October 25 ken November 3 ket batang ti Zone 1, II, III, IV, V, VI, Bulag, Taleb ken Naguiddayan.
Inton October 26 ken November 4 ket batang ti Bgry. Balaleng, Boquig, Cabaroan, Puspus, Sinabaan, Cabalanggan, San Mariano, Banaoang ken Taguiporo.
Nakaituding met nga inton October 27 ken November 5 ket batang iti Brgy. Ora, Capangdanan, Sagneb, Quimmarayan, Cabusligan, Malingeb, Tay-ac ken Lingsat.
Kasta pay nga inton October 28 ken November 6 ket schedule ti Brgy. Sagpat, Guimod, San Julian, San Isidro, Mira, Aggay, Paing ken An-annam.
Malimitaran dagiti aktibidad a maisayangkat kadagiti kamposanto ta ti laeng maipalubos ket ti panagsindi iti kandela ken panangipan kadagiti sabong ken panangkararag.
Kas panangsurot ti National IATF Resolution ket mapalubosan nga agturong kadagiti kamposanto dagiti menor de edad ken senior citizen idinto a naallukoy dagiti vulnerable individual a kas ti addaan ti parikot ti salun-at ken masikog a saanen nga agturong tapno masalwadan ti salun-atda.
Ti pass slip nga aramaten dagiti agindeg iti Bantay ket masapul nga aggapu ti Barangay Kapitan ket ti bearer wenno mangidaulo ti pamilia ket rumbeng a kaduana ti pamiliana nu sumrekdan ti kamposanto idinto a dagiti bumisita manipod sabali nga ili iti probinsia ket agtaud ti pass slip wenno stubda iti Municipal Health Office wenno Rural Health Unit apaman a makarehistroda.
Gapu ti pandemia ket dagiti laengen agtagilako ti kandela ti mapalubosan nga aglako iti aglawlaw ti kamposanto ta maipariten ti panangilako ti taraon ken non-food products.
Nayunay-unay kadagiti aglako a nainget a surotenda iti basic health protocol a kas ti panagaramat ti face mask, regular a panagbuggo ti ima ken panangsurot ti social distancing.
