VIGAN CITY – Dakkel a karit para iti Commission on Elections ti mangsapul kadagiti lugar nga awan ti kasona iti Covid19 para ti satellite registration kas pinasingkedan ni Spokesperson James Jimenez ta isu ti maysa kadagiti nainget a criteria a sursuroten ti ahensia para ti agtultuloy a panagparehistro dagiti botante.
Iti exclusive interview ti Bombo Radyo Vigan ken ni Jimenez, May 10 idi narugian ti satellite registration ngem uray no adda koordinasyondan kadagiti mall developers ket masapul a ti lugar a nakapaitakderan ti mall ket awan ti kasona iti Covid19.
Kabayatanna, malimitaran iti lima a tao laeng ti maipalubos kadagiti pagbotosan karamanen ti watcher, botante ken dagiti board of election inspectors tapno saan nga agdudupudop dagiti tattao isu a mayatiddug ti oras ti panagbotos isu a maikonkonsidera ti saan laeng a maymaysa nga aldaw ti eleksion.
Nagbalakad met ti opisial iti publiko a saanda a makipaset kadagiti social media survey ta delikado para kadagiti personal nga impormasyonda ken saan nga isu ti pagibasaran dagiti nangabak a kandidato.
Iti agdama, namnamaen ti ahensia a nasursurok ngem iti 60 million a tattao ti agbotos inton May 9, 2022 gapu ta lagpasen iti targetda nga uppat a milion a nagparehistro bayat ti agtultuloy a panagparehistroan.
