Inlawlawag ti Department of Justice (DOJ) a kasapulan a pormal a maipasa ti ebidensya ni dati nga Ako Bicol Party-list Rep. Zaldy Co kalpasan iti imbutaktakna sakbay a maidalan iti panagadal ken beripikasyon.
Am-amwen ti DOJ iti sumagmamano a paset wenno serye dagiti video nga inruar ni Co iti account-na a nangibutaktakanna a mapapati nga immawat da President Ferdinand Marcos Jr. ken dati a House Speaker Martin Romualdez iti binilion a pisos a kickback manipod iti P100 billion budget insertions ita 2025.
Segun ken ni DOJ Spokesperson Atty. Polo Martinez, dagiti ebidensya kas kadagiti litrato wenno video ket masapul nga agbalin a paset kadagiti proceedings a rumbeng a pormal nga ipila sakbay a maidalan iti authentication ken verification.
Immunan a kinuna ni Martinez a nakasagana iti gobierno nga ipan ni Co iti Witness Protection Program nu kas bilang kiddawenna ngem kasapulan a personal a makikammayet para iti aplikasyon.
