VIGAN CITY – Mabuya laengen babaen iti online ti Facebook page ni Governor Ryan Singson ti tinawen a maang-angay a Search for Saniata ti Ylocos kas paset ti Kannawidan Festival ngem itan ket naawagan a Lockdown pageant gapu ti Covid19 pandemic.
Iti pannaki-uman ti Bombo Radyo Vigan ken Provincial Tourism Officer Ryan Astom, duapulo ket uppat a kandidata ti agsasalip iti nasao a beauty pageant a ti pre-pageant ket maangay inton January 31 idinto a ti coronation ket inton February 2.
Idiay laeng Ichtus beach resort ti Brgy. Alangan, Magsingal ti pakaaramidan dagiti aktibidad ti pageant kas ti photoshoot, swimwear competition, videoshoot ken dadduma pay.
Awan ti mapalubosan a mapan iti nasao a resort nga agbuya kas kadagiti naglabas a pageant kas panangsalwad iti salun-at ti tunggal maysa ta dagiti laeng kandidata, judges ken production staff ti agtalinaed iti uneg ti resort.
