VIGAN CITY – Matamtaming idiay Candon City General Hospital ti maysa a pamilya a naglugan iti tricycle a nakidinnungpar ti kinassinnabet da a Mitsubishi Adventure idiay Sitio Romas, Brgy. Suso, Sta. Maria tattay alas-9:10 iti agsapa.
Nabigbig dagiti nakalugan ti Honda TMX 155 Tricycle a da Jun Vinluan nga agtawen ti tallo pulo ket innem nga isu iti nagmaneho ken dagiti pasahero na a ni Catherine nga agtawen ti tallo pulo ket pito nga asawa na ken ti anak da nga agtawen ti lima nga agpapada a taga- Oaig Daya, Candon City.
Kabayatanna, ti met nagmaneho ti Mitsubishi Adventure ket ni Kurt John Ace Baoit, agtawen ti dua pulo ket pito, empleyado ti Department of Social Welfare and Development – Candon City nga agnaed idiay Barangay Poblacion, Banayoyo.
Segun ken ni Police Lt. Gilbert Tolosa, deputy chief of police ti Sta. Maria municipal police station, agpapadaya a direksyon iti tricycle a nagluganan ti Vinluan family idi inovertakan ni Jun iti sar-sarunwen da a 10-wheeler truck a nakasapgidan na iti sidewheel iti truck.
Agsipud iti dayta, saan a nakontrol ni Jun iti manibela iti tricycle isu a nadungpar na iti kinasinnabet na a lugan a minaneho ni Baoit isu a naipurwak iti nagluganan da a tricycle iti gutter iti igid iti kalsada, pati dagiti agina nga inlugan na.
