VIGAN CITY – Sangapulo ket uppat a nagsusugal ti nakemmeg kadagiti dua nga ili iti probinsia babaen ti nagsina a pannakaiwayat ti Anti-Illegal Gambling operation.
Walo a tattao a naga-ayam iti mahjong ti nakemmeg idiay Barangay Ansad, San Esteban.
Dagiti suspek manipud iti Table 1 ket da Myrna Elaydo Pader, agtawen iti limapulo ket pito; Lorna Manzano Castro, agtawen iti innem a pulo ket lima; Jhonny Beria Busto, agtawen iti pitopulo ket lima; Anderson Santiago Castro, agtawen iti limapulo ket pito, agpapada a taga-Barangay Ansad.
Nakemmeg met manipud iti table 2 da Gibson Santiago Castro, agtawen iti limapulo ket lima; Erickson Abad Espanto, agtawen iti tallopulo ket innem ken ni Enalyn Vergara Elaydo, agtawen iti limapulo ket tallo, agpapada a taga-Barangay Ansad ken ni Cris Guzman Tamayo, taga-Barangay Cabaroan, San Esteban.
Naala kadakuada ti dua a set ti mahjong dice ken pusta a PHP1,055 manipud iti table 1 idinto nga iti table 2 ket PHP965.
Kabayatanna, innem a tattao met ti nakemmeg idiay Barangay Nagsuputan, San Juan.
Nabigbig dagiti suspek a da Dolly Singson Visario, agtawen iti uppat a pulo ket maysa; Julian Ponce Austria, agtawen iti uppat a pulo; Romy Pacorsa Pablo, agtawen iti limapulo ket innem, agpapada a taga-Barangay Nagsuputan.
Da Richard Ragadi Erese, agtawen iti limapulo ket maysa; Junel Batayola Jimenez, agtawen iti tallopulo ket dua, agpada a taga-Barangay Barbar, iti nasao nga ili; ken ni Richard Aquino Visario, agtawen iti uppat a pulo ket pito, taga-Barangay Sarsaracat, Magsingal.
Naaktuan dagiti suspek nga agaayam iti Pepito ket naala kadakuada ti maysa a set ti baraha ken pusta a PHP6,175.
Sangwen dagiti suspek ti kaso a panaglabsing iti Presidential Decree 1602 wenno Anti-Illegal Gambling Act.
