VIGAN CITY – Sangapulo ket maysa iti nakemmeg gapu iti panagtatadi da idiay Sitio Hidalgo, Brgy. Tay-ac, Bantay, Ilocos Sur.
Nabigbig dagiti suspek a da Leon Hidalgo Monces, agtawen ti tallopulo ket dua; Edwind Kasal Santiago, agtawen ti limapulo ket dua; Adriano Lopez Hidalgo, agtawen ti limapulo ket innem; Joseph Viernes Pula, agtawen ti tallopulo ket innem; Jose Laurente Madriaga, agtawen ti pitopulo ket lima; Eric Pagaoa Hidalgo, agtawen ti uppat a pulo ket maysa nga agpapada nga agnaed idiay Brgy Tay-Ac, Bantay; Agapito Merculio Bautista agtawen ti limapulo ket siam; Reymark Mercurio Bautista, agtawen ti tallopulo nga agnaed idiay Brgy Cabaraon, Bantay; Dionisio Domenden Lopez agtawen ti limapulo ket dua, Babet Domenden Tipon agtawen ti tallopulo ket dua nga agpapada nga agnaed idiay Brgy Lingsat, Bantay; ken Maximon Palacpac Presto, agtawen ti limapulo ket innem nga agnaed idiay Brgy Ora East, Bantay.
Nakaawat iti impormasyon ti Bantay Municipal Police Station inaig iti illegal cockfighting isu nga insigidada a nakikammayet iti dadduma pay unit tapno isayangkat iti operasyon a gappuanan ti pannakakemmegda.
Naala kadakuada iti tallo a karton iti slasher gaff, siam a sibibiag a pagtadi a manok, maysa a natay a pagtadi a manok, pusta a Php 65,490, siam a motorsiklo, maysa a motorized tricycle ken maysa a bisikleta.
Kabayatanna, addan ti kustodiya dagiti pannakabagi ti linteg dagiti suspek pakairamanan dagiti naala kadakuada tapno dumalan ti husto a proseso.
