VIGAN CITY – Sangapulo nga improvised Polyvinyl Pyrotechnic Device wenno boga manipud kadagiti tallo nga ili iti probinsia idinto a tallo ti boluntaryo a naisuko iti ili ti Nagbukel.
Uppat a piraso ti nadumaduma a boga nga aggatad iti sangagasut limapulo a pisos ti nakumpiskar da Barangay Captain Rosalina Cacut idiay Barangay McKinley, Galimuyod.
Dua a piraso met ti nakumpiskar manipud kada Leo Llanes, agtawen iti duapulo ket maysa a taga-Barangay Don Alejandro Quirolgico, Caoayan ken ni Joey Querubin, agtawen iti duapulo a taga-Don Dimas Querubin, Caoayan.
Kabayatanna, idiay met Barangay Poblacion, San Estean ket nakaawat iti tawag ti San Esteban Police Station manipud ken ni Barangay Kagawad Luzon Guzman a mangipakpakaammo iti kaadda dagiti menor de edad nga agaayam iti BOGA iti barangayda.
Binallaagan ni Guzman dagiti menor de edad a maiparit ti panagusar iti boga ket kinumpiskarna kadakuada ti uppat a piraso.
Kabyatanna, tallo met a boga ti insuko iti Nagbukel Police Station ni Army Tagayon a taga-Poblacion East, Nagbukel babaen ti panangiwayat dagiti pannakabagi ti linteg iti information dissemination iti “Ligtas Paskuhan” ken iti EO 28 series of 2017 kasta payen ti RA 7183 babaen ti Revitalized Kasimbayanan ken ti Oplan Arirang.
