VIGAN CITY – Maisagsaganan ti kaso kontra ken ni William Quintua, alyas Iking, agtawen iti innem a pulo ket dua, taga-Barangay Poblacion, Sta. Catalina gapu ti mapapati a panangtakawna iti kuarta ni Emmalyn Rapanut, agtawen iti uppat a pulo ket lima, sekretarya, agnaed met laeng iti nasao a lugar.
November 27 idi inreport ti biktima iti Sta. Catalina Police Station a ti wallet-na a naglaon iti sangapulo a ribo a pisos ken 210 USD; vaccination card -na, vaccination card ni Jay Rapanut, Jay Emerson Rapanut ken ni Janella Ellyce Rapanut; nadumaduma nga ATM ken ID a linaon ti bag-na ket mapukpukaw ken mapapati a tinakaw ti suspek.
Alas syete y media ti November 26 ket nagiinom ti biktima ken suspek iti balay ni Kikay Rapanut, idin ta inkabil ti biktima ti bag-na iti concrete grills ti terrace ket pinanawanna ta rimuar gapu ti tawag a naawatna ngem idi agsubli ket nakalukaten ti bag-na.
Iti kabigatanna ket nadlaw ti biktima a ti wallet-na nga aglaon iti nasao a gatad ket mapukpukaw.
Dagus a nagsubli ti biktima iti lugar ket nakitana pay a naiwara dagiti dadduma a banag a mapukpukaw iti paset nga immisboan ti suspek.
Idi sinaludsodna dagiti kakaduana, nadakamatda a nakitada ti suspek nga agtaktakder iti sangwanan ti bag-na sa napan iti kasipngetan.
