VIGAN CITY – Sangapulo a construction worker ti nakemmeg gapu ti panagsugalda idiay Barangay San Nicolas, Candon City babaen ti naiwayat nga anti-illegal gambling operation.
Nabigbig dagiti suspek a da Clenton Cortez, agtawen iti duapulo ket siam, Joseph Gacayan, agtawen iti uppat a pulo ket dua ken ni Kevin Cortez, agtawen iti tallopulo ket dua nga agpapada a taga-Barangay Tablac, Candon City; Carmelo Magday, agtawen iti uppat a pulo ket pito, taga-Sudipen, La Union; Mark Neil Joseph, agtawen iti tallopulo, taga-Brgy. Langlangca 2nd, Candon City ken ni; Arvin Greg Galano, agtawen iti tallopulo ket uppat, taga-Barangay Baybayabas, Santiago.
Malaksid kadakuada, nakemmeg pay ni Aljun Limon, agtawen iti duapulo ket siam, taga-Brgy. Baybayabas, Santiago; Erectsoon Bernan, agtawen iti uppat a pulo ket lima, taga-Barangay Gayaman Luba, Abra; Ryan Dela Cruz, agtawen iti duapulo ket tallo, taga-Brgy. Bagar, Candon City ken ni; Abe Galimba, agtawen iti uppat a pulo ket pito, taga-Casilagan Norte, Banayoyo.
Naaktuan dagiti suspek nga agaayam iti pusoy ket naala kadakuada ti maysa a set ti baraha ken pusta a PHP750.
Nakakustodian dagiti suspek iti Candon City Police Station ket sangwenda ti kaso a panaglabsing iti Presidential Decree 1602 wenno ti Anti-Illegal Gambling Act.
