Sangapulo a baka nga aggatad iti P500,000 a nailugan iti Isuzu Truck/Bus ti nasalamaan idiay Barangay Bio, Tagudin, Ilocos Sur.
Dagiti naglabsing ket da Kevin Hermie Malagayo Castro, agtawen iti tallopulo ket tallo, taga-Barangay 002 Seresa Street, Torres, Mapandan, Pangasinan kadua dagiti helperna a da Mark Anthony Zarcilla Tapalla, agtawen iti tallopulo ket maysa, taga-Barangay Lambayan, Mapandan, Pangasinan; Carlos Briggs Mejia Mamayson, agtawen iti tallopulo ket lima, taga-Minien West, Sta. Barbara, Pangasinan; Emo Jhon Beniez Bandong, agtawen iti duapulo; ken ni John Paul Sibayan Garcia, agtawen iti duapulo ket uppat, agpada a taga-Barangay Banaoang, Sta. Barbara, Pangasinan.
Linabsing dagiti nadakamat a nagan ti Provincial Ordinance No 15-06 series of 2015 section 4 paragraph b gapu iti falsified shipping permit ken paragraph c wenno ti unlawful unloading of shipment iti uneg ti probinsia.
Addan iti kustodia ti Tagudin Animal Quarantine dagiti naglabsing agraman dagiti baka sakbay a maiturn-over iti Provincial Veterinary Office, Vigan City.
