VIGAN CITY – Umabot iti sangagasut duapulo ket walo a pamilia wenno nasurok innem a gasut nga indibidual ti agtaltalinaed kadagiti open ground evacuation area idiayZone 1, Barangay Tangadan, San Quintin, Abra gapu ti pangta ti landslide kalpasan ti napasamak a magnitude 7 a gingined idi napan a lawas a nagsentro iti nasao a probinsia.
Iti pannaki-uman ti Bombo Radyo Vigan ken ni Mayor Jovellen Aznar, agtultuloy ti repacking kadagiti relief goods a maipaay kadagiti residente sipud idi napasamak ti gingined.
Adda met hygiene kits, sleeping kits, food packs a naggapu iti Department of Social Welfare and Development para residente kasta payen a manamnama ti pannakaipaay manen ti sangagasut duapulo ket walo a food packs kadakuada.
Malaksid dayta, adda pay dagiti tent a naggapu iti Amerika ken modular tents a naggapu iti DSWD nga isu ti mapagtitinnulongan ita a maibangon babaen ti Santa Coast Guard, Philippine National Police, Bureau of Fire Protection ken dagiti bumarangay.
Tawen 1990 idi napasamak manen ti gingined ket nagrengngat bassit ti bantay nga adda iti nasao a lugar a kimmaro ita gapu ti napigsa a gingined idi napan a lawas.
Posible met a maapektaran ti Zone 2, Zone 3, ken dadduma a paset ti Zone 4 no kas bilang agreggaay ti daga.
