Umaboten iti 100 a kaso ti vote buying ti nairekord ti Legal Network for Truthful Elections para iti 2025 national and local elections.
Segun ken ni LENTE Executive Director Atty. Rona Ann Caritos, kaaddoan kadagiti insidente ket mapapati a napasamak iti barangay hall, pagtaengan dagiti botante ken kadagiti naudi a gatherings.
Inlawlawag ni Caritos nga immadu dagiti report ti vote-buying idi Biernes (May 9, 2025) iti rabii, dua nga aldaw sakbay iti election ken nakararu ita a midterm election ngem iti national election.
Innayonna a pitopulo a porsiento a reklamo iti naawatda ket vote-buying idinto a 30% ket ti panagabuso ti state resources kas ti panagiwaras ti ayuda dagiti kandidato iti baet ti kampania a maysa a klase ti advantage kadagiti incumbent.
Kabayatanna, impakaammo ti Commission on Elections a nakaawaten ti Kontra Bigay Committee iti nasurok uppat a gasut a reklamo mainaig ti vote-buying, vote-selling ken panagaramat ti government resources iti kampaniada.
Nagpanawagan ti LENTE iti publiko nga agbalin a naalibtak tapno mapagtalinaed iti nadalus ken patas nga eleksyon ita May 2025.
