Agtultuloy ti panangduktal dagiti pannakabagi ti linteg iti San Juan Police Station iti pannakatay dagiti agama gapu iti pammaltog ti riding-in-tandem idiay Barangay Lapting, San Juan, Ilocos Sur.
Dagiti biktima ket nabigbig a da Barangay Captain Bello Joseph Padua Valorozo, agtawen iti limapulo ket dua, idinto a ti putotna ket ni Jumar Sotelo Valorozo, agtawen iti duapulo ket uppat, agpada a taga-Barangay Caronoan, San Juan.
Iti pannaki-uman ti Bombo Radyo Vigan ken ni PLT. Reynald Ramos, saan nga ilaklaksid dagiti pannakabagi ti linteg ti pulitika ken ti panaggapu dagiti biktima iti galyeraan iti panangduktalda no ania ti motibo iti panangpapatayda kadakuada.
Innayonna nga iti panangkitada iti CCTV footage, idi naggapu dagiti biktima iti galyeraan ket sumursuroten kadakuada dagiti nagkalubbon a suspek ket idi madanonda ti nakapasamakan ti insidente, pinaltugan dagiti suspek dagiti agama.
Ulo ken bakrang ti tama ti barangay captain idinto a maysa met ti tama ti putotna.
Naala iti nakapasamakan ti pammaltog ti tallo a basyo ti caliber 45.
Kabayatanna, saan a ninamnama ni Barangay Kagawad Rolly Vita iti pannakapapatay ti Kapitan ta awan met ti nakarir-ririna.
Iti pannaki-uman ti Bombo Radyo Vigan ken ni Vita, nasayaat ti panagserbina ta no adda dagiti emergency ket isuna ti makammo a mangitartaray iti ospital.
Kas maysa met nga agindeg iti ili ti San Juan, nadakamat ni Elena Jacob nga awan pagkunaanda ken ni Kapitan ngem adda laeng dagiti dadduma a kumkontra kenkuana.
Nadakamatna pay nga agingga ita ket adda pay laeng dagiti agsaksakit ti nakemda gapu iti panangabak ti Kapitan idi eleksyon.
