Nakita manen ti Samar Rafflesia (Rafflesia manillana), maysa kadagiti rare ken napeggad a mula nga agsabong iti Pilipinas, iti uneg iti Samar Island Natural Park kalpasan iti sangapulo ket lima a tawen.
Naduktalan dayta iti maysa a survey iti Protected Area Management Office tapno amwen ti agdama a kasasaad ken lokasyon iti species. Naudin a nairekord ti Samar Rafflesia idi March 2011.
Kinumpirmaran dagiti botanist a da Dr. Pastor Malabrigo Jr. ken Dr. Julie Barcelona ti pakabigbigan ti mula.
Segun ti DENR, karaman ti Samar Rafflesia kadagiti endangered species gapu iti bassit a populasyonna ken pangta a pannakadadael iti pagnanaedanna.
Ti Rafflesia ket maysa a parasitic plant nga awan iti bukodna a bulong, branch wenno ramut.
Segun kadagiti environmental official, ti pannakadokumento iti Samar Rafflesia ket mangipakita iti kinapateg ti Samar Island Natural Park iti panangtaripato ti biodiversity ken mangpatibker iti pagkasapulan a salaknib iti kabakiran kontra iti illegal logging, land conversion ken dadduma pay a pangta.
