Pinasingkedan ni Rep. Joey Salceda a saan a nasken a pagdanagan ti panagkapsut ti piso nga immabot iti P60 kada dolyar, no di ket ad-adda pay a saganaan.
Segun ken ni Salceda, adda dagiti sektor a makaganar iti daytoy kas kadagiti Overseas Filipino Worker ta nangatngato ti gatad dagiti remittance-da.
Mabenepisyaran pay ti export sector, nangruna ti semiconductor, gapu ta nangatngato ti pastrek iti piso manipud iti dolyar.
Innayonna a mabalin a pumigsa ti turismo gapu ta nalaklaka ti Pilipinas para kadagiti gangannaet a turista.
Inallukoyna ti gobierno a mangidatag iti plano kas ti panangbukel iti travel packages ken suporta iti dollar-earning sector.
Posible pay nga umabot iti P62 kada dolyar ti sukat, isu a napateg a masaganaan a naimbag tapno maksayan to epektona kadagiti Pilipino.
