VIGAN CITY – Natay gapu iti panagbekkelna ni Sheryl Nonan, agtawen iti duapulo ket siam, naasawaan, tubo iti Tabbugan, Claveria, Cagayan ngem agdama nga agnaed iti Calay-ab, Sto Domingo.
Napasamak ti insidente iti balay ti asawana iti Bulag West, Bantay.
Insigida a nagresponde dagiti pannakabagi ti linteg iti Bantay Police Station idi naipakaammo kadakuada ti pasamak.
Pinasingkedan ni Lordes Parel, agtawen iti innem a pulo ket maysa, pinanawanda ti biktima a maymaysa iti pagtaenganda ngem idi makasublidan, nasarakandan a nakabitin iti uneg ti kusina babaen ti extension wire nga imputipotna iti tengngedna isu a dagus met a nagpaarayatda kadagiti kaarrubada tapno maibaba ti biktima.
Maibasar iti accounts ti asawa ti biktima a ni Nathaniel Nonan, agtawen iti tallo pulo ket tallo, makapaspasar iti nakaro a sakit ti ngipen ti asawana sipud pay idi September 19 ket naisawangna nga agpakamatay tapno agsardengen ti marikriknana a sakit.
Malaksid dayta, mapapati a saanna kayat nga ipakita iti dentista ti parikotna iti ngipenna gapu iti amakna a lumaad.
Nupay kasta, agtultuloy ti imbestigasyon dagiti otoridad inaig ti napasamak.
