Nagpanawagan iti tulong ti Quirino Police Station kadagiti adda ammona maipanggep iti napasamak a panagtakawan iti uneg ti maysa a kompania ti delivery express idiay Poblacion, Quirino a tumulongda iti imbestigasyon dagiti pannakabagi ti linteg para iti naal-alisto a pannakasulbar ti kaso.
Iti pannaki-uman ti Bombo Radyo Vigan ken ni Police Lt. Giovanie Bisnar, manarimaan ti panangkitada kadagiti CCTV footages iti lugar tapno mabigbig ti kinasiasino dagiti suspek.
Maipalagip nga impakaammo ni Eufemia Rose Pioquinto, agtawen iti duapulo ket pito, naasawaan, Human Resource Representative iti RF Express Service Corporation wenno company branch iti J&T delivery Express nga agnaed idiay Barangay Remedios, Cervantes ti napasamak a panagtakawan iti uneg ti sorting facility idiay Tikeng River, Barangay Poblacion, Quirino.
Segun ken ni Pioquinto alas syete iti bigat idi kalman ket simrek iti hub-da tapno agduty ngem nadlawna a ti arwangan ti finance office nga ayan ti vault ket nakalukat isu a kinitana.
Nakadlawna pay a ti sliding window iti likudan ti pasilidad ket napwersa a nalukatan babaen ti pannakadadael ti grills iti sliding window.
Nagaramat dagiti suspek iti landok tapno dadaelen dagiti grill iti tawa nga isu ti mapapati a nagnaan a simrek ken pimmanaw dagiti suspek.
Innala dagiti suspek ti gray safety vault nga adda markingsna a SAFEWELL nga adda kargana nga P111,594 a kuarta iti unegna.
