Pinagsisinnungbatan iti Quad Committee ti saan a panagatender ni dati a Presidente Rodrigo Duterte iti Quad Committee hearing.
Kinuestionaran ni Cong. Joseph Stephen Paduano ti surat nga impatulod ti kampo ni dati a Presidente Duterte.
Nailanad iti surat nga impatulod ti legal counsel ni Duterte a saan a makaatender gapu iti edad ken sakitna.
Inyunay-unay ni Cong. Paduano, a mabalin nga umatendar ti legal counsel-na a ni Atty. Martin Delgra kas pannakabagi ni Duterte no saan a makaatender.
Kinunana pay a saan a valid ti surat nga impatulodna gapu ta imbagana nga awan ti naipatulod kadakuada a medical certificate ken awan ti authorization ti nadakamat a surat manipud iti dati a presidente.
Kabayatanna, inlawlawag met ni Quad Comm overall lead chairman ken Surigao del Norte 2nd District Rep. Robert Ace Barbers, nga awan ti special treatment nga inubra ti Kamara gapu ta ti laeng situasion ti dati a presidente ti ikonsiderarda.
Para met kenni Gabriela Women’s Party-list Rep. Arlene Brosas, saan a kaawat-awat ti desision iti Kamara gapu ta maibasar koma daytoy iti rules and regulations.
Innayon pay ni Brosas a saan a patas ti saan a panagatender ti dati a presidente ken dakkel a pananginsulto iti publiko gapu ta rinibu a biktima ti natay babaen ti panangidaulona.
Kamaudiananna, kinuna ni House Quadcom member Benny Abante a rumbeng pay nga agpaimbag ni Duterte tapno makaatender iti sumaruno a hearing.
Immannugot dagiti agpapanday-linteg a mai-extend ti hearing ken ikkanda ti gundaway ti dati a presidente nga agsao ken mangidepensa iti bagina kontra kadagiti pammabasol kenkuana.
