VIGAN CITY – Saan a maipasigurado dagiti kameng ti Philippine National Police Crime Laboratory idiay Candon City no iti nasarakan a rurog idiay Sitio Patpat, Brgy. Poblacion Norte, Lidlidda ket babai uray nu adda iti nasarakan a sando, leggings ken sandals na.
Segun kenni Police Lt. Nilo Domingo, officer in charge ti Candon City Crime Lab, maipan ti nasao a rurog ti tao a nasarakan idiay Lidlidda idiay Medico Legal Division ti National Headquarters ti Philippine National Police tapnu maduktalan nu babai wennu lalaki iti akin-rurog.
Nadakamat ni Domingo a nu maibasar iti nakita da ket posible a rurog ti babai ta dakdakkel dagiti tulang ti lalaki nu iyarig kadagiti babbai ngem masapul a mapaneknekan latta babaen iti naan-anay a panagadal ken siyensiya.
Innayon ti opisyal a mammuan pay babaen iti eksaminasyon nu adda iti foul play iti pannakatay ti biktima a mapatta-patta a naikali iti nasao a lugar tallo tawenen iti napalabas kas maibasar iti langa na.
Kabayatanna, dua a lawas agingga makabulan iti urayen sakbay a maamuan iti resulta iti dumalanan nga eksaminasyon wennu panagadal iti nasarakan a rurog ti tao.
