VIGAN CITY – Burburtiya pay laeng kadagiti kameng ti Lidlidda municipal police station nu siasino ti babai a nakali da iti rurog na idiay Sitio Patpat, Barangay Poblacion Norte, Lidlidda.
Ti rurog ti saan pay nabigbig a biktima ket ikoten ti PNP Crime Laboratory idiay Candon City para iti naan-anay nga imbestigasyon.
Ti esklusibo a pannaki-uman ti Bombo Radyo Vigan ken ni Melchor Abalos Jr., nga agtawen ti tallo pulo ket tallo, baro ken agnaed iti nasao a lugar, agkalkali iti kamangeg idi aksidente nga adda iti nakali na a rurog ti tao.
Nadakamat na a nakarus na pay iti sumagmamano a paset iti rurog ti tao ta kimmalepkep wennu naiputipot jay kamangeg a kaliyen na kuma.
Agsipud iti dayta, inpakaammo na nga insigida kadagiti kameng ti Lidlidda PNP iti nakita na ket ita manarimaan pay laeng iti imbestigasyon da.
Nadakamat met ni Police Senior Master Sergeant Jay Callejo, duty investigator ti Lidlidda PNP, nga awan iti naireport a mapukpukaw a tao idiay Lidlidda a kas maibasar iti nadanun na a record isu nga awan a pulos iti pangrugiyan da nga agimbestigar.
Ti lugar a nakasarakan iti rurog ti tao ket maysa a kilometro iti kaadayo na manipud iti sentro ti ili ngem saan a mastrek dagiti 4-wheels a lugan agsipud ta desdes ken nasulinek unay.
