VIGAN CITY – Naitabonen idi kalman iti rurog ti maysa a babai a nasarakan idiay Sitio Patpat, Barangay Poblacion Norte, Lidlidda idi November 28.
Segun ken ni Police Senior Master Sergeant Iris Lois Pamaran ti Lidlidda municipal police station, inpaima ti Crime Laboratory Office idiay Candon City idi kalman kadakuada ti nasao a rurog ket isudan iti naka-ammo a nangitabon babaen iti tulong ti local a gobiyerno ti Lidlidda.
Sakbay a naitabon ket nangala da pay iti specimen para iti naan-anay a panagadal.
Nu kaspangarigan adda iti mapan to iti police station a mangbigbig iti rurog ket ipakita da laengen dagiti naan-anay a dokumento wennu resulta iti dimmalanan a panagadal iti rurog tapno makitada no isu iti sapsapulenda.
Saan pay laeng a maisarra iti nasao a kaso agsipud ta agtultuloy iti panangisayangkat da iti follow up investigation ket agpatinggan to laeng iti panagimbestigar da agingga a mabigbig nu siasino ti biktima, nu anya iti rason iti pannakatay na ken nu siasino iti nangpapatay kenkuana.
