Nagballaag ti Region 1 Tripartite Wages and Productivity Board a mabalin a sumango iti pannusa dagiti employer a saan a sumurot iti naipatungpal a baro a wage order a dagiti minimum wage earner iti Ilocos Region ket makaala iti nayun a sueldo manipud P37 to P45.
Iti pannaki-uman ti Bombo Radyo Vigan ken ni Atty. Romina Boado – Cabrillos, Board Secretary ti Tripartite Wages and Productivity Board, dagiti employer a saan a sumurot iti naituding a panagpangato iti sueldo ket mabalin a mapatawan iti double indemnity.
No matakuatan ti Department of Labor and Employment a naglabsing dagiti employer, agbalin a doble ti bayadanda kadagiti empleado.
Sangwenda ti criminal offense, mamuelta iti P25,000 – P100,000 depende iti kadagsen ti panaglabsing.
Mabalinda pay a mabalud iti saan a nabab-baba iti dua a tawen ken saan a nangatngato ngem iti uppat a tawen.
Kabayatanna, impannakkel ni Cabrillos a nangato ti compliance rate ti rehion iti panagited iti husto a sueldo ta umab-abot iti 96 percent.
