Kinumpirmaran ti National Task Force West Philippine Sea (NTF-WPS) a balligi ti naisayangkat a Rotation and Resupply (RoRe) Mission idiay Ayungin Shoal.
Segun ti NTF-WPS, nakaipatulodda ti civilian vessel ti Armed Forces of the Philippines nga ML Lapu-Lapu kadua ti BRP Cape Engaño ti Philippine Coast Guard ti essential supplies kadagiti suldado iti pagilian a naka-istasyon ti BRP Sierra Madre.
Kabayatan iti operasyon, nakita iti asideg iti lugar ti agduduma a Chinese maritime forces pakairamanan dagiti uppat a barko ti Chinese Coast Guard, tallo a People’s Liberation Army-Navy vessels ken dua a Chinese Maritime Militia vessels.
Nupay kasta ket awan ti aniaman nga inaramid a tignay dagiti Chinese vessel tapno mariribok ti rotation and resupply mission.
Immunan a nagtulag ti Pilipinas ken China ti provisional understanding iti maisayangkat a RoRe idiay Ayungin Shoal tapno ikkaten ti tensyon ken maliklikan ti saan a pagkikinnaawatan idiay West Philippine Sea.
