Pinasingkedan ni Senate President Pro Tempore Panfilo Lacson nga imbitaranda ti nagikkat a ni Rep. Elizaldy Co ken ni dati nga Speaker Martin Romualdez kadagiti sumaruno a panagdengngeg ti Senate Blue Ribbon Committee mainaig iti anomalya iti likudan dagiti maanomalya a flood control project.
Segun ken ni Lacson, ditoy a makontra ti saan a husto a panangipagarup dagiti dadduma a sektor a ti Blue Ribbon Committee ket adda kankanunongan wenno salsalwadanna a personalidad.
Para ken ni Romualdez, kinuna ni Lacson a maidalan ti imbitasion ken ni House Speaker Faustino Dy III.
Iti agdama, ur-urayen ti komite dagiti sumagmamano a developments iti kaso sakbay a maituding ti sumaruno a panagdengngeg ta kada baro a napateg a mapasamak a kasapulan a maimbestigaran ket mangisayangkatda latta ti panangdengngeg.
