VIGAN CITY – Imbilin ni Ilocos Sur Gov. Ryan Singson a masapul nga ikumpleto dagiti Returning Overseas Filipinos nga aggapu kadagiti pagilian wenno lugar a nakairekordan iti UK variant cases ken South African variant ti Covid19.
Nakailanad iti Executive Order nga imparuar ni Gov. Singson a sakbay a makastrek dagiti nasao nga ROFs ket masapul nga adda maiparangna a certificate manipud iti Bureau of Quarantine a nakumpletona ti 14-day quarantine period apaman a nakasangpet ditoy pagilian.
Kasapulan pay ti negatibo a resulta iti RT PCR test, travel authority ken certificate of acceptance wenno pammaneknek a nakikammayetdan kadagiti opisial iti pagawidanna nga ili.
Iti maikalima nga aldaw a panagtalinaedna iti probinsia ket masapul a dumalan manen iti RT PCR test ken dagiti negatibo ti resulta ken nakakompleton iti quarantine period da ket mabalinen nga agawid a makadua ti pamiliada ngem sa laeng makaruar iti pagtaenganna no agnegatibo iti maikalima a testing na.
Kabayatanna, iti maika-sangapulo ket uppat nga aldaw a kaaddana ditoy probinsia ket dumalan manen iti RT PCR test idinto a dagiti saan a nakakompleto iti quarantine period na ket maipan iti isolation facility iti LGU tapno ikompletona.
