Inlawlawag ti maysa a rockstar lawyer a saan a mabalin nga iserbi ti warrant of arrest iti abogado para iti maysa a kriminal a kaso.
Dayta ket kalpasan ti panangibaga ti abogado ni Senador Ronald ‘Bato’ Dela Rosa a ni Atty. Jimmy Bondoc nga alaenna lattan ti WOA ket isunanton ti mangted iti kliyentena.
Iti pannaki-uman ti Bombo Radyo Vigan ken ni Atty. Carlo Ybañez, nakakatkatawa ti panangibaga ti abogado ni Bato iti dayta a banag agsipud ta nalawag a no warrant of arrest para iti kriminal a kaso ket adda nayonna a pannakakemmeg ken pannakaibalud.
Kinunana a saan a mabalin ti ‘proxy’ ta maibasar iti pagallagadan ti korte, ti panangiserbi iti WOA ket saan laeng a simple a panangiyawat iti papel no di ket personal a maiserbi babaen kadagiti arresting officer.
Patien ni Ybañez a mabalin a naallilaw ni Bondoc gapu ta no summon ket isu ti mabalin a maiserbi iti abogado no la ket daytoy ket mainaig kadagiti civil case.
