VIGAN CITY – Manarimaan iti imbestigasyon ti Vigan City police station iti robbery hold-up a napasamak ti maysa a convenience store idiay Barangay San Julian Sur, Vigan City idi alas diyes ti rabii ti January 25.
Simrek iti pagtagilakoan ti saan pay a nabigbig a suspek a naka-abungot ti t-shirt nga adda iggem na a screw driver nga intutok na iti kahera a ni Charlotte Argallon, agtawen ti dua pulo, balasang nga agnaed idiay Barangay Nagsangalan, Vigan City ket inpangta na nga iduyok na iti screw driver nga iggem na nu saan na nga ited kenkuana ti naglakoan na.
Agsipud iti dayta, nagbuteng ti biktima isu nga inted na ti tallo ribo a pisos a naglakoan na sa pimmanaw ti suspek.
Segun ken ni Shermalee Fieldad a maysa met laeng a kahera ti nasao a pagtagilakoan, inpagarup ni Argallon a gumatang ti lalaki a simrek ngem pinagduduwaan na ta adda iti iggemna nga screw driver ken nakaabungot iti rupa na.
