VIGAN CITY – Awanen iti kaso ti African Swine Fever idiay Rizal ken Bulacan kas pinasingkedan ni Agriculture Secretary William Dar iti pannaki-uman kenkuana ti Bombo Radyo Vigan.
Ngem, segun ken ni Dar, adda ti maysa pay a lugar a banbantayan da ta adda dagiti report a nakadanun kadakuada nga adda dagiti matmatay a baboy.
Agsipud iti dayta, inpatungpal dan iti 1-7-10 protocol iti nasao a lugar a ti kayat na a sawen ket iti uneg ti maysa a kilometro a radius manipud ti lugar nga ayan dagiti natay a baboy, amin a taraken a baboy, apektado man wennu saan iti ASF ket patayen wennu uramen da tapnu mapaksyat ti virus.
Mangted met ti tallo ribo a pisos a tulong – pinansiyal ti DA kadagiti maapektaran nga agtartaraken iti baboy, sabalin to laeng ti burias nga ited da nu masigurado nga awan ton ti ASF virus iti nasao a lugar.
Pinagkedkedan ni Dar nga ibuksilan nu anya a lugar iti agdama nga imon-monitor da tapnu saan a mapan dagiti kameng ti media iti lugar, uray dagiti sabali pay a tattao tapnu saan da nga agbalin a carrier ti sakit.
