VIGAN CITY – Natay ni Joel Cudiamat, agtawen iti uppat a pulo ket pito ta tinagbat ti kabsatna a ni Lolito Cudiamat, agtawen iti uppat a pulo ket dua nga agpada a taga-Brgy San Juan, Cervantes.
Adda ti saan a nagkinnaawatan dagiti agkabsat inaig ti sanikua a gapuanan ti panagbinnatoda iti tunggal maysa ket pinadas pay nga inanawa ti kabagyanda ngem saanda latta a napnek ta nangala ti suspek iti bolo idinto a ti biktima ket adda met bunengna.
Nagundawayan ti suspek a tinagbat ti kabsatna iti nadumaduma a paset ti bagi ti kabsatna a naipaagas iti balay pagagasan pakairamanan ti maysa a menor de edad a nadunor ti imana bayat ti panangpasardengna kadagiti agkabsat nga agrirriri ngem dead on arrival ti biktima.
Nakemmeg ti suspek ken naala iti nakapasamakan ti krimen ti 15 inches a buneng ken 22 inches a bolo nga inaramat ti suspek a pinangbagkong iti biktima nga isuna met la mismo ti nangisuko kadagiti pannakabagi ti linteg.
