VIGAN CITY – Riri iti daga ti rumrumuar a motibo iti pannakapapatay ni Rudey Steward Sayen kas maibasar iti imbestigasyon ti Abra Police Provincial Office.
Iti pannaki-uman ti Bombo Radyo Vigan ken ni Police Provincial Director Police Colonel Mali Cula, natiliwda aminen dagiti uppat a suspek a nainaig iti pannakapaltog ti biktima.
Nabigbig dagiti suspek a da Sonny Boy Gandeza Tullas, drayber ti gunman, Aldrin Alagao, maysa a lookout, Abelardo “Abe” Talape, middle man ken ni Romel “Ambong” Paa, gunman.
Segun kadagiti suspek, nabayadan ida iti sangagasut a ribo a pisos, ket manipud iti nasao a gatad, innem a pulo a ribo a pisos ti naaladan nga isu ti nagbingayan da Tullas ken ni Talape.
Maipalagip a napaltugan ti Sayen kabayatan ti panagturongna idiay Suyo National High School a sinurot met dagiti suspek agingga idi nadanunda ti Barangay Lipcan, Bangued, Abra nga isu ti panangpaltogda kenkuana.
Dua a motorsiklo ti inaramat dagiti suspek – dagiti dua a nagkalubbon ket napan pay iti pagtaengan ti biktima idinto a ti dua a kaduada ket agbambantay iti sangwanan ti gasolinaan.
Kabayatanna, calibre 45 a paltog ti naaramat iti pannakapapatay ti biktima.