Rinibo a South Korea protesters a mangsupsuporta ken mangkonkontra ken ni President Yoon Suk Yeol ti nangisayangkat iti rally idiay South Korea kagiddan ti pannakayuray ti desisyon ti constitutional court iti impeachment ni Yoon.
Nasurok innem a pulo a ribo a supporter ni Yoon ti dimmarup idiay Gwanghwamun Square, segun iti patta dagiti kapulisan.
Nasurok 18,000 nga anti-Yoon protesters met ti nangisayangkat iti rally iti asideg ti constitutional court para iti pannakaikkat ni Yoon iti puesto.
Ad-adu pay a protester ti napan ta rinambakan ti nasao a pagilian ti anibersaryo ti March 1 Independence Movement.
Saan pay nga imbaga ti Constitutional Court no kaano ti ruling ni Yoon ngem adda agingga innem a bulan sipud December 14, a pannakaipila ti kaso.
No maikkat ni Yoon, nasken a maisayangkat ti baro a presidential election iti uneg ti innem a pulo nga aldaw.
