VIGAN CITY – Arigna saan a mabuteng dagiti residente idiay Sofia, Bulgaria iti Covid19 gapu iti pannakipasetda iti protesta ket saan payen a masursurot ti social distancing.
Iti pannaki-uman ti Bombo Radyo Vigan ken ni Bombo International Correspondent Faith Denila, massage therapist iti nasao a pagilian, dua a bulanen a rinibo ti agprotprotesta iti rabii uray no nainget dagiti pagannurotan nga impatungpal ti gobiernoda ta dagiti saan a sumurot iti 14-day quarantine ket mabalin a mabalud iti tallo a tawen wenno mamuelta iti sangaribo agingga sangapulo a ribo a leva a katukad ti lima a ribo a euro.
Numan pay in-inut ti panaglukat ti ekonomia ti nasao a pagilian ket adu dagiti establisimiento a saanen a naglukat ken nagsublin ti face to face classes dagiti estudiante.
Kabayatanna, pinasingkedan ni Denila a gapu iti panagpositibona iti Covid19 ket nariknana iti suporta kenkuana ti Filipino community idiay Bulgaria ken uray pay negatibon iti panunotna idi naapektaran iti virus ket pagyamananna a nalasatna met laeng babaen ti panangpapigsa ti resistensyana ken panangikakararag ti pamiliana a lumaing.
