VIGAN CITY – Uppat a pulo ket pito a ribo pito pulo ket walo a pamilya iti naikkat ti listaan dagiti benepisyaryo ti Pantawid Pamilyang Pilipino Program (4Ps) ditoy Region 1 a kas maibasar iti kaudian a rekord ti Department of Social Welfare and Development (DSWD) – Region 1 idi August iti agdama a tawen.
Sumagmamano kadagiti rason nu apay a naikkat dagiti nasao a pamilya iti listaan dagiti 4Ps beneficiaries ket awan ti anak da nga agtawen iti agingga sangapulo ket walo; misrepresentation; panagsugal ken panangisalda iti cash card da; duplicate household; saan da a sinurot dagiti kondisyon iti programa ken boluntaryo a nagikkat da ta adda iti pangalaan dan iti pagbiyag da wennu naaddaan dan iti pagsapulan.
Maibasar iti nasao a rekord, ti probinsiya ti Pangasinan iti kaaduan iti pamilya a naikkat iti listaan idinto a ti met probinsiya ti Ilocos Norte iti kabassitan iti pamilya a naikkat iti listaan.
Sakbay a naikkat dagiti rinibo a pamilya kas 4Ps beneficiary, dimmalan da pay iti nainget nga assessment babaen kadagiti case managers iti ahensya.
