VIGAN CITY – Agtultuloy iti imbestigasyon dagiti otoridad inaig iti pannakakita iti bangkay ti maysa a retired Philippine Army iti daya a paset iti covered basketball court idiay Brgy. Taguiporo, Bantay.
Segun ti Bantay Municipal Police Station ti lalaki ket ni Demetrio Vicencio Barroga, agtawen iti limapulo ket uppat, naasawaan, mannalon nga agnaed iti nasao a lugar.
Nakaawat dagiti otoridad iti tawag manipod ti Barangay Captain iti Taguiporo, Bantay inaig iti pannakakitada iti nasao a lalaki isu a nagrespondeda.
Segun ti putot ti biktima a ni Mary Joe Barroga, agtawen iti duapulo ket walo, construction worker nga agnaed met laeng iti nasao a lugar idi alas syete iti bigat idi kalman ket sinapulna iti amana isu a nagturong iti taltalon ngem idi nakadanonen ket nakitana laengen a saan nga agang-anges ti amana isu a nagpaarayat.
Indeklarar ni Dr. Mary Almira Divina iti Municipal Health Office Bantay a natayen ti biktima ken napansinda iti dara manipod ti ulo ti biktima ken dunor iti akin-kannawan a lapayagna.
