Retirado a pulis idiay Sta. Maria, napaltugan, natay

VIGAN CITY – Naun-uneg nga imbestigasyon iti isaysayangkat dagiti otoridad idiay Sta. Maria gapu iti pannakapapatay ti maysa a retirado a pulis idiay Barangay Poblacion Sur, Sta. Maria.

Nabigbig ti biktima ni Reynaldo Deocales Castro nga agtawen ti innem a pulo ket maysa, naasawaan ken agnaed idiay Barangay Baliw Laud, Sta. Maria.

Naduktalan a napan iti kamposanto ti biktima ta napan nagdalus iti pantsong dagiti minnatay da, kadua na ti dua a trabahador na.

Agtugtugaw iti monoblock chair iti igid iti kalsada ti biktima ta kitkitaen na dagiti trabahador a binaon na nga agdalus kadagiti pantsong dagiti minnatay da idi adda limmabas iti sangwanan na a nakamotorsiklo.

Idi nagsubli dagiti nakamotorsiklo a limmabas met laeng iti ayan na ti biktima, isun iti panangpalto-paltog da kenkuana a nagsagabaan na iti tama iti naduma-duma a paset iti bagi na sa da naglibas nga insigida.

Maysa a tricycle driver iti nangipakaammo kadagiti kameng ti pamilya na iti napasamak ket napan ti putot na iti nakapasamakan iti pammaltog nga isu iti nangitaray idiay Ilocos Sur District Hospital- Narvacan ngem naideklerar a dead on arrival.