VIGAN CITY – Inruaren ti Department of Education Region 1, San Fernando, La Union ti resulta iti 2021 Regional Validation of Brigada Eskwela Best Implementing Schools babaen kadagiti regional evaluator ti DepEd Region 1.
Manipud kadagiti nadumaduma a pagadalan iti intero a rehion, pito a pagadalan iti Ilocos Sur ti nairaman iti top 5.
Para iti Elementary Level, Small School category ket rank 2 ti Amarao Elementary School iti ili ti Sta. Cruz; iti Medium School category ket rank 2 ti Paing Elementary School ili ti Bantay; ken iti Large School category ket rank 1 ti Mabilbila Integrated School iti ili ti Santa.
Para met iti Secondary Level, rank 2 para iti Small School category ti San Pedro National High School iti ili ti Narvacan; iti Medium School category ket rank 2 ti Libtong Integrated School iti ili ti Tagudin; ken iti Large School category ket rank 2 ti Candon National High School iti siudad ti Candon idinto a rank 5 met ti Tagudin National High School.
Kabayatanna, napagtalinaed met ti Ilocos Sur National High School ti maikanem a pwestona para iti Regional Special Awards – Most Sustained Schools.
