VIGAN CITY – Target ti Vigan City Government babaen iti panangidaulo ni Mayor Juan Carlo Medina a mabakunaan kontra COVID19 dagiti agnaed ti siudad nga agtawen iti sangapulo ket walo agpangato.
Iti pannaki-uman ti Bombo Radyo Vigan ken ni Mayor Medina, umabot iti siam a pulo a milion agingga sangagasut lima pulo a milion a pisos ti mabalin nga aramatenda para iti panagbakuna kadagiti residente ti Vigan ken no masapul nga umutang pay iti LGU ket aramidenda.
Ti sangagasut duapulo a ribo a dose ti COVID19 Vaccine manipod AstraZeneca ket aramaten dagiti innem a pulo a ribo nga agnaed ti Vigan ken saan a karaman dagiti agtawen ti sangapulo ket pito agpababa ta saan a nairekomendar a para kadakuada.
Kayat ti mayor a maisublin iti ekonomiya ti siudad isu a mabakunaan dagiti agnaed ti Vigan ket mairaman payen dagiti tricycle driver, kutsero, market vendor ken dadduma pay uray no agnaedda iti sabali nga ili.
Maysa ti Vigan City Government kadagiti uppat a siudad ti intero a pagilian nga immuna a naaprubaran ti national government.
