VIGAN CITY – Saan a ninamnama ti taga-Pidigan, Abra a ni Engr. Daniel James Molina a maibilang kadagiti top 10 a pimmasa iti Engineering Licensure Examination numan pay kinalikagumanna latta met ti agbalin a top 1 ngem ti panagbalinna a top 4 ket yamanen ken pakaragsakanna unayen.
Iti pannaki-uman ti Bombo Radyo Vigan ken ni Molina, bonus la kenkuanan ti panagbalinna a top 4 ta iti kalkalpas ti exam ket natalek met a nasungbatanna iti husto dagiti kwestyon iti exam-da.
Malaksid ti review program ti review center a napanan na ket nangaramid met iti bukodna tapno ma-assess ti bagina no ania dagiti saanda pay a naadal a naimbag ket dagiti paset a pakarigatanna ti tinutukanna nga inadal.
Ubing pay laeng idi arapaapnan ti agbalin nga inhinyero ta paboritona iti Mathematics isu a kinalikagumanna ti mangala iti kurso nga Engineering idi magtengannan iti kolehio.
Para kenkuana, adda pagsyaatanna no nalaing iti Mathematics ta nalaklakanto laengen a mayaplikar iti engineering ngem adda latta pay met sabali nga aspeto iti siyensia a masapul a mayaplikar.
Kabayatanna, iti kinabayag a panagur-urayna iti resulta ti eksaminasyon ket impaayna pay laeng ti atensyonna kadagiti sabali a bambanag kas ti panagay-ayamna iti chess, videogames ken puzzles tapno maliklikanna ti kanayon a mangkita iti resulta ti website kas ti ar-aramiden ti sabali ta saanna kayat a pagdanagen unay ti bagina.
