Top 5 iti Midwifery Licensure Exam ti maysa a taga-Tinaan, Sta. Maria, Ilocos Sur nga agad-adal iti University of Northern Philippines.
Iti pannaki-uman ti Bombo Radyo Vigan ken ni Shiela Jane Verzosa Doles, ti panagbalinna a topnotcher ket saan a para laeng iti bagina no di ket para iti pamiliana.
Saanna a namnamaen ti panagbalinna a maysa kadagiti topnotcher agsipud ta adu dagiti pangbalawanna idi iti bagina kabayatan ti inda panagreview sakbay ti exam.
Nagbalin ti inspirasyonna ti nangampon kenkuana agsipud ta ti inana ket natay idi agtawen iti innem.
Iti agdama, planona nga ituloy ti panagadalna ken ti mangragpat kadagiti dadduma pay nga arapaapna iti biag.
Segun met ken ni Dr. Joussa Bermo, pakaragsakanda ti maikapat a daras a panagbalin a top performing school ti UNP College of Health Sciences ken pagyamanna dagiti amin a pannarabay a naaw-awatda manipud kadagiti university ken collegen official.
November 2022 idi umuna a daras nga agbalin a top performing school ti UNP ta addada iti maikalima a puesto, November 2023 ket addada iti umuna a puesto, April 2024 ket addada manen iti maikalima a puesto idinto nga ita nga April 2025 ket addada iti maikadua a puesto.
39 manipud kadagiti 40 a first taker ti pimmasa ken nakapasa met ti maymaysa a retaker.
