VIGAN CITY – Dakkel a karit manen para ken ni 2nd Lt. John Romuald Corpuz a taga-Caoayan, Ilocos Sur ti sumarsaruno nga aldaw kalpasan ti panagturposna iti Philippine Military Academy Bagsik Diwa Class of 2022 agsipud ta isunton ti gundawayna nga agserbi kadagiti Pilipino.
Iti exclusive interview ti Bombo Radyo Vigan ken ni Corpuz, rugi pay laeng para kenkuana ti kalkalpas a graduation-da iti akademya.
Idi isuna ket adda pay laeng iti sekondarya, saanna nga ammo no ania ti alaenna a kurso no agkolehio isu a dinamagna ti amana ket insingasingna met ti panangpadasna a sumrek iti PMA ngem gapu ta adu ti Math subject ket napaay ta aminado a pagkapsutanna ti nasao nga asignatura.
Nupay kasta, nangala ken nagturpos iti kurso a Political Science idiay University of the East-Manila ngem idi nakalagip ti maysa a gayyemna iti sekondarya ket napanunotanda ti nageksam iti PMA.
Gapu ta napagasatan met a nakapasa ket intuloyna ti simrek iti akademya.
Saan a kayat ti inana idi a sumrek iti PMA gapu ti amakna a maisagmak ti biagna isu a saanna nga imbagbaga ti panageksamna ngem iti kamaudiananna ket naawatna met laeng ken sinuportaranna ti arapaapna.
Immunan a nag-apply a kas paralegal iti maysa a private cable company ken nagapply pay a kas AFP contractual wenno civilian human resource ket idi dimteng ti initial screening iti AFP ket saanen a nagtuloy a nagpa-interview iti kompania a nagaplikaranna gapu ta arapaapna met ti agbalin a militar.
Innayon ni Corpuz a ti damo ti karigatan a paset ti padasna iti PMA ta isu ti gundaway a maikkat ti galad ti maysa a sibilian tapno maindoktrinaanda a nasayaat no kasano ti klase ti training ken no kasano ti mindset a masapul ti maysa a future military officer.
Malaksid dayta ket narigat pay ti awan a komunikasyonna iti dua a bulan kadagiti ay-ayatenna iti biag isu nga adda diary a pangisursuratanna kadagiti pasamak iti inaldaw idinto nga ibilangna met a ti graduation ti karagsakan a paset ti padasna.
Napanunotanna met ti sumuko ngem gapu ta adda dagiti mangay-ayat kenkuana nga upper class da nga isu ti mangsansanay kadakuada nga agbalin a natibker ken nangsursuro no kasano ti aganus ket intuloyna latta ti biag iti akademya.
Nagbalin nga inspirasyonna ti pamiliana ta kayatna ida nga ikkan ti napintas a masakbayan ken kasta met ti “special someone-na” a nagserbi kas support system-na.
Inallukoy ni Corpuz dagiti agar-arapaap nga agbalin a kadete a gundawayan ken saganaandan ti ageksam inton bulan ti Agosto ket numan bilang saanda a makapasa, kinunana a saanda a pulos a maawanan ti namnama a mangpadasto manen.
