VIGAN CITY – Nakaalerto latta dagiti residente idiay Illinois gapu ta posible nga adda pay laeng tornado kadagiti sumarsaruno nga aldaw idiay Amerika a nakaapektaran dagiti innem nga estado a ti kakarwan ket ti Kentucky.
Iti pannaki-uman ti Bombo Radyo Vigan ken ni Engr. Kenneth Reyes idiay Chicago, Illinois, sumaysayaat metten ti paniempo iti amianan a paset ti Illinois nga ayanna no yarig iti southern ken central a nakadadaelan ti adu a sanikua ken nakatkatayan dagiti tattao.
December 10 ket nakaawatda iti severe weather alert warning iti devastating tornado a mapasaran ti lugarda ket pinasingkedanna a husto met ti oras a panagballaag ti gobiernoda tapno makapag-evacuate da a nasapsapa.
Kabayatanna, umaboten iti nasurok walopulo ti natay ken adda pay dagiti mapukpukaw gapu ti napasamak a tornado nga imbilang pay ni US President Joe Biden a maysa kadagiti kakarwan a didigra napasamak iti pagilianda.
