VIGAN CITY – Nagduduma ti nagbalin a reaksyon dagiti residente idiay America kangrunaan la unay dagiti agsinnumbangir a grupo ti pulitika inaig ti pananagipariten ti US Supreme Court iti abortion.
Iti pannaki-uman ti Bombo Radyo Vigan ken ni Bombo International Correspondent Isidro Madamba manipud iti Los Angeles, California, agraragsak dagiti adda iti Republican party agsipud ta isuda ti mangitaltal-o iti daytoy a paglintegan idinto a makagura met dagiti Democrat ta saanda a pabor iti nasao a banag.
Sakbay pay laeng a nairuar ti desisyon ti US Supreme Court ket adun dagiti grupo ti babbai nga adda kadagiti kalsada a mangiyeb-ebkas iti riknada mainaig ti abortion.
Innayon ni Madamba a saan laeng a rinibo no di ket ginasut a ribo wenno minilion dagiti agpapaikkat kadagiti nadumaduma nga estado iti Amerika isu a naskenna a maamyendaran ti nasao a linteg.
